Müstəqil idman qəzetinin elektron versiyası 15 noyabr, 2007 22:39:15
TAHİR
Getmək istəyirsən, bəhanəsiz get!
Qurbanov üçün romantikadan uzaq bir yazı
Getmək istəyirsən, bəhanəsiz get! Rəhmətlik Nüsrət Kəsəmənli bu sətirləri qələmə alanda sırf romantik hisslərə qapılmışdısa, mənim bu misraları xatırlamağımda başqa bəhanə var. O bəhanədən danışıram ki, bizim yarlı-yaraşıqlı, "Cip"li-"Mersedes"li futbolçularımız ondan özünə əla silah hazırlayıb. Özü də o silah heç kimə yox, ana vətənə qarşı hazırlanan gülləylə doldurulub.
Bəli, millidən imtina etmək istəyənlər "bəhanə silah"ını dolduraraq baş məşqçini hədəf almaqla yüz minlərlə azarkeşin ürəyini hədəfə alır. Əcəb işdi, kim yığmada oynamaq istəmir, bəhanə gətirir. Biri deyir ki, filankəs yığmada oynamırsa, mən də oynamayacam. Digəri deyir ki, baş məşqçi məni yığmaya çağırmırsa, onun başçılığı altında heç vaxt çıxış etməyəcəm. Daha nələr və nələr.
Getmək istəyirsən, bəhanəsiz get! Hər halda, rəhmətlik Nüsrət Kəsəmənli bu misraları arzularında yaşatdığı ideal bir gözəl-göyçək xanıma həsr etmişdisə, mən bu sətirləri heç ideallarımın əlinə su tökməyə layiq olmayan yığmadan imtina edənlərə həsr edirəm. Eşq olsun sizə! Siz həqiqətən də bu yığmaya çox şey vermisiz. Qələm əhlindən tutmuş azarkeşlərə qədər hamımız sizin yanınızda gözü kölgəliyik. Bəhanə nədi, nə ilə istəyirsiz yığmanın başını döyəcləyin. Yox, deyəsən, söhbətə "düzgün söhbət"lə başlamadım. Onsuz da Hacievski bu başıbəlalı millini güclə yığıb toparlayıb, küsülüləri barışdırıb. Qələmimi iti edərəm, qarşıdakı iki oyunda bizi əməlli-başlı biabır edərlər. Sonra da belə yazıları BƏHANƏ gətirərlər ki, bizi siz "sındırdız". Yaxşısı budu yığmadan kənarda qalan (ya da qalmağı özü istəyən) və qarşıdakı mümkün uğursuzluğumuzda heç bir bəhanə gətirəcək gücdə olmayan İlqar Qurbanova üz tutum!
İlqar, getmək istəyirsən, bəhanəsiz get! Bu milli Makedoniyadan dünən gələn Hacievskinin deyil. Bu milli yolunda yüzlərlə şəhid qanı axan vətənindi. Hansısa futbolçunun yığmaya çağırılmaması onun "sındırılması" yox, daha da motivasiyalı olması üçün lazımdı. Yığmaya dəvət almamağın, daha da inkişaf etmən üçün zəruridi. Qəzetimizin xarici şöbəsinin yazarı olduğum üçün Avropa futbolundan bir misal gətirəcəm. Stiv Maklaren ötən il İngiltərə yığmasının "sükanı arxasına" keçəndə birmənalı olaraq Devid Bekhemdən imtina etdi. Bütün İngiltərə futbol ictimaiyyəti (o cümlədən Bekhem) Stivin düzgün addım atmadığını bilsə də, baş məşqçi "fitə basılmadı". Gör o vaxt Bekhem dedimi Maklaren yığmadan gedəndən sonra milli formanı geyəcəm? Əksinə, sonradan baş məşqçi onu yenidən "milli qvardiya"ya qəbul edəndə Devid oyunuyla sübut etdi ki, Maklaren, sən səhvsən. Bax, İngiltərə yığması sənin məni vaxtında yığmaya çağırmadığına görə indi pis vəziyyətdədi.
İlqar, sənə nə olub? Oyna və sübut et ki, millinin formasını geyməyə layiqsən. Bizə görə narahat olma. Biabırçı hesabla uduzduğunuz matçları sizə bağışlaya bilərik. Təki gələcək oyunlarda motivasiyalı olub başımızı ucaldasız. Sən də eynən Bekhem kimi sübut et ki, Hacievski səhvdi. Sağ ol, "Beşiktaş"a qol vurdun. Bizə mesaj göndərdin ki, bacarıqlı futbolçusan. Eh, bilmirsən sənin "Sivasspor"una necə can- dildən azarkeşlik edirik. Sən "Beşiktaş"a qol vuranda redaksiyamızda əsl toy-bayram idi. Zarafat deyil, Azərbaycan futbolçusu "Beşiktaş"a, (bir az da şişirdək) ÇL-də oynayan komandaya, özü də "İnönü"də qol vurdu. Biz sənin "Sivasspor"unu məhz sənə görə özümüzə yaxın bilirik. Sən isə dünən gələn (bəlkə də gələcəyimizi quran) Hacievskiyə görə millidən imtina edirsən. Bilirsənmi, Hacievski səni çağırmamaqla şəxsən məni necə üzmüşdüsə, sənin bu hərəkətindən sonra lap utandım. Getmək istəyirdin, bəhanəsiz gedəydin.
P.S. Sənə gələcək karyeranda uğurlar arzu edirəm. O gün olsun səsin daha güclü klublardan gəlsin. Əminəm ki, o vaxt yığmaya bəhanəsiz gələrsən. Getdiyin kimi...
ANA SƏHİFƏSİNƏ
www.football-plus.az
Copyright İdman qazeti "FUTBOL+" Design (c) 2005 Musa Mammadli
--->: ILGAR GURBANOV
--->: ILGAR GURBANOV
Normal
